Romans 8

1Ntu cenu, knizun to lo nna aza ba, n ɓa zhin Kristi Yesu nya n. 2Ntuge iko Zafun wye-wyei ga nyaiko ye zhin mi nya nu dna Kristi Yesu-kwo la mi loya n laifi awun n ofiyi. 3Ato gni yi, n laifi akun ntuge yi kpe Shekwoyi awyidna ye lo nun, ntuge yita mi n ɓa kni ya shi bwan, ama Shekwoyi wa zhin zokwo do wa gni yi, wa tnu n wo Nugun yi dna n Zanyikwoci nayi ngye eyi nya, ama eyi anya n laifi yi wa wun laifi iko ya n yi tukwo. Wa ga wohin tukwo hadaya ntu yi alaifi ɓo. 4Ntu cenu, nsaiye yi ɓa mi ya vi Shekwoyi awyidna n ya vi Zafun Gyi-gyi-yi, to ya vi nayi kwo-kwoi n kwo dna n yi nyin.

5Aza nɓa fa oɓa nayi kwo-kwoi kwoi bwa iko tu n ɓa tukwo, ɓa vi ɓahin ɓeye nu. Ama aza n ɓa vi Zafun Gyi-gyi-yi, ɓa nu zhin oɓo n kwo da Shekwoyi. 6Oza n wo vi Zafun ɓeye wo ɓa bwa wye-wyeyi n bugba-fuyi. Ama oza nu wa vi nayi wo ɓa fi. 7Ntuge eyi oza kwo-kwoyi n kwo dna yi nyi kwo zhin nuɓayi nu n Shekwoyi, kwo ta ye kwa shi Shekwoyi awyidna bwan, kwoi ta min. 8Cenu zhin, aza n ɓa fi n ɓa nayi kwo-kwoyi iko sinta ɓai vi oɓa aɓo fawo n shakpe nukwoyi, ɓa ta mi ɓa zhin ɓo n kwo da Shekwoyin.

Oza Woiwoyi Nu Gyi Be

9Ama fyeto wu lo nun oza woi-woi nu zhin iko n fyei, ngye fye, n Shekwoyi Zafun yi lo n dna n fye mi, (Fya pa oza n wo to n Kristi Zafun yi dnalo n wo min, wo to zhin Kristi viyi nun kwo fyewyi.) 10Ko Idayake Kristi dnalo n mi ofya nayi ɓa fi ntu n laifi ɓo, ama of ya wyewyeyi ɓa pwo ntuge Kristi nku gafara zhin fye. 11Ndei Shekwoyi Zafun nwa la Yesu kala n efi nyi, n dnalo n fyemi wo ɓa zhin ofye a nayi fifiyi, ɓa bwa wye-wyei nfye efi avun, ntu n zafun ye ɓo n wo dna n fye nyi.

12Ntu cenu, omi azaje yeyeyi kwo to zhin tilas nu nge fya vi ofye za kwo-kwoi ɓo fya zhin ɓo nwa gna fyem. 13Ntuge n fya vi kwo fye ku bwi, aɓa ta fye, ama dna n Zafun Gyi-gyi-yi iko fya ɓakwoya n kwa ɓenukwoi zhin yi fye ɓa pwo. 14Aza vinya n Shekwoyi Zafun wu ɓa zokwo ɓanu zhin Shekwoyi aɓi.

15Nlonu yi to ze ngye afyenu, yi wo dna n, ama yi zhin aɓo n gye Shekwoyi aɓi nwa gwo ɓa fi n wo iyali ɓai yiwo “Dada, Dada”. 16Ntuge owo Zafun Gyi-gyi-yi daɓo n yi n ya bugba mi n ge yi zhin Shekwoyi aɓi nu. 17Shi yi zhin owo aɓi nu nyi, yi ɓei gyiwo gado – ntuge nya n Shekwoyi gawo Nugun Yesu kwo zhin eyi nyanu ce. Ama n yi ye owo mwa-mwa tilas ya gye azhin nkunsun nwoi.

18Wahala n yi sin n saiye nyi kwo to kunce lo a mwi kwo do n mwa-mwai n wo ɓei gayi nyin. 19Ntuge Shekwoyi anya zhin-zhin vinya zhi ɓai pmi nu, n hakuriyi, n awyetu yi nyipyei n Shekwoyi ɓei ku owo aɓi kala n fi. 20– 21Ntuge dna nyipyei hi, akna wuyi atakanda, laifi, efi, nbwo-bwoyi–anya vinya nɓa gyi nasara tu n na anyi tukwo to n kwo ɓeyei dna n Shekwoyi gbe ga–ɓa ɓei ku bwiwye- anyi vinya ɓei gwo mwa-mwa ɓai bwa loloya n laifi, n Shekwoyi aɓi bwa kwo agmada nyi.

22Ntuge yi kpelo anya-zhin-zhin ngye anya-fanya n agbe-gbei na shinwa yi ɓa bwa nyasan ɓai fi nge ɓa pmi nyipyei ye. 23Eyihin a Yesu viyi ko shiko nyi yi n Zafun Gyi-gyi-yi dna lo n yi mi ngye tuze eyi mwamwa nya, yi do dna n yi wye-wyei mi, a lo yi ya n na azhin-gye n wahala yi, yihin ce yi pmi nyipyei, wyi n Shekwoyi ɓei gayi eyi loloya towo aɓi nya ɓedo n nayi woi-woyi n wa zhin yi alkawali nyi, anayi n nyasan ta shan ɓa san, ɓai ta shan fin.

24A gniyi n gaiciya ga mi nu, gaiciya zhin awyetu nya n yi to ncei lo nsayi yen. Oza n wo n nyayi wota shan awye tun, waga gaiciya nge wo ɓa bwa kwon. 25Ama ndei yi ga Shekwoyi gaiciya n nya tukwo n kwoto zhin, kwo wu yi nge yi pmi n hankuri yi n bugba kalai.

26Dna n zokwo gmanyi Zafun Gyi-gyi-yi bmayi zhin n yi aɓesa yi fyegyi-fyegyi dna n yi aduwa zhin mi. Ntuge yi ta kpe nya ye lo n yi ɓa zhin aduwa n kwo tukwon, kwo n yi ɓa zhin cewon. Ama Zafun Gyi-gyi-yi zhin aduwa n tu yiɓo n bugba shanwo yi n na ta mi ada n gbeyi m. 27Eyi dada, n wo kpe eyi abugba ye n yi, wo kpe nya ye n Zafun da, sanu nwo gyiwye gayi dna n Shekwoyi ɓeye nyi. 28Yi kpelo ge aɓo vinya nɓa bwayi ɓa lo tnu-tnu manayi n yi aba, ndei yi ye Shekwoyi lo, yi-i kunce lo nwo shiri yi.

29Ntuge, tunyi n kmisunyi, Shekwoyi ɓei ku da aza vinya n ɓa ɓe wo aba, wo ɓei n cei pma-kpe aza nɓa ɓa ɓe–ɓa ze ngye owo Nugun, n na bai owo Nugun wa ze oza kmisunyi dna nwo azaje. 30Shi wa kni yi, wa yi yi nge yi ɓe dawo, sanu n ya ɓe ncei wa ze yi ge, “tna laifi da,” Wa nuyi n Kristi ɓemanayi wa gayi agni-gni manayi n wohin yi, wa zhin yi alkawali owo mwa-mwa nya.

Shekwoyi Ma Lo N Yi Bwa

31Yi ɓa da gena tu aɓe a wo-woi ye tukwoʼa? Ndei Shekwoyi malo n yi bwa, nyikado nu ɓa zhin gaba n yiya? 32Tunda wo to kni wo Nugun gnin, ama wa gawo ntu yi ɓo vinya, wota gayi anya vinya ngnisun nwoyin?

33Nyikado ɓa da ɓeda nukwoyi tu n yi tukwo, Aza n Shekwoyi laɓa kni ɓa ze owo nya? Shekwoyi? Awo, owo nu na zhin yi gafara wa gayi agni-gni manayi n wohin yi.

34Nyikado ɓa zunyi knia? Kristi nu ɓa zun yi kni? Awo, gama owo nu na fi n yi ɓo, wa la kala n efi ntu yi ɓo, woi sase tulo n Shekwoyi aba, n latu dnagmayi aba, woi gyi wye gayi n eshemi.

35Nyikado nu ɓa gwo yi Kristi yeye ya? Sanu n ya sin wahala kwo a zhin, sanu n na zan yi shin kwo Zawuyi, ntuge wota ye yi lonu? Sanu mikun gunyi to yi ye n gyiwye yin, ko yi dna n na a-zhin-gye kwo aye awuyi, Shekwoyi n ku yi ya n nu?

36Awo, gama littafi a gnayi, ntu n wo ɓo tilas ya zhin shiri ya sin wahala n saho-sahoyi, yi wu ngye akni nu n ɓa pmi a wuɓa. 37Nna ɓeye vinya, Nasara zhin yi nyanu dna Kristi n wa ye yi wa fi ntu n yi ɓo nyi. 38Ntuge mila gaiciya ga nyaho tami kwa gnayi aje n Shekwoyi yeye yi n. Efi ta min, wyewyei ta min, a malayika ta min, anapi kala vinya ta min kwa gwo yi Shekwoyi yeye yan, Eyi dnawo n naiye nya, n bugba wun yi nsu nya yi. 39Kwo aba n yi nyi, n eshe bmana, dna n nuwan yakwo min, Nyaho ta mi kwa gnayi ajeya n Shekwoyi yeye yin n wa wuyi dna n Yesu Kristi, Sanu n wa fi n yi ɓo nyin.